धर्म ठूलो कि मानवता ? यी कट्टर मुसलमानलाई सोध्नुस् जसले मानवताको लागि ‘रोजा’ तोडिदिए

धर्म ठूलो कि मानवता ? यी कट्टर मुसलमानलाई सोध्नुस् जसले मानवताको लागि ‘रोजा’ तोडिदिए

एजेन्सी। धर्मको नाममा साम्प्रदायिक दंगा भइरहेको अवस्थामा एक मुसलमान युवकले यतिसम्म महान कार्य गरेका छन् जसले अहिले पनि धर्मभन्दा पहिले मानवता हुने पुष्टि गरेको छ । ती युवकले अर्का एक हिन्दू युवकको ज्यान बचाउनको लागि रमजानको पवित्र महिनामा आफ्नो ‘रोजा’ तोडिदिएका छन् । रोजा मुसलमानहरुको निकै पवित्र धार्मिक क्रिया हो र यो अवधिमा निकै कडाइका साथ नियम पालना गरिन्छ । रमजानको पवित्र महिनामा कुनै मुस्लिमले रोजा तोड्नु सानो कुरा होइन त्यसमाथि एक हिन्दूको लागि रोजा तोड्नु त अझै आश्चर्यको कुरा हो ।

२० वर्षका हिन्दू युवक अजय विजल्वाणको ज्यान खतरामा देखेर आफ्नो रोजा तोड्ने ती मुसलमान युवकको नाम आरिफा खान हो । उनी भारतको देहरादुनका बासिन्दा हुन् । अजयको कलेजोमा संक्रमण भएको थियो र उनी आइसीयूमा थिए । डाक्टरले उनका परिवारलाई छिटोभन्दा छिटो रगत जुटाउन भने किनकि कलेजोमा संक्रमण भएका कारण उनको रगतमा प्लेटेलेट्सको संख्या निकै तीव्र गतिमा घटिरहेको थियो । अजयको लागि उक–एक मिनेट निकै महत्वपूर्ण थियो । थोरै ढिलो हुँदा उनको ज्यान जान सक्थ्यो ।

सबैभन्दा ठूलो समस्या त्यतिबेला पर्यो जब अजयलाई चाहिएको ए पोजेटिभ ग्रुपको रगत पाइएन । यस्तो अवस्थामा अजयका परिवार निकै समस्यामा परे । यत्तिकैमा एक व्यक्तिले अजयका पितालाई सामाजिक संजालको सहयोग लिन सुझाव दिए । अजयका पिताले सामाजिक संजालमा सहयोग माग्दै पोस्ट राखे । तत्कालै यो पोस्ट हेरेर आरिफ खान नामका व्यक्तिले अजयका पितालाई आफू रगत दिन तयार भएको भन्दै फोन गरे ।

आरिफ रगत दिन त तयार भए तर डाक्टरको सुझावअनुसार उनले रगत दिनुअघि केही खानुपथ्र्यो । आरिफ केही पनि खान असमर्थ थिए किनकि उनको रोजा चलिरहेको थियो । आरिफले केही नखाइ रगत लिन अनुरोध गरे तर डाक्टरले केही नखाइ रगत लिँदा आरिफको स्वास्थ्यमै खतरा हुने भन्दै रगत लिन मानेनन् । आफ्नो रोजा कायम राख्दा अजयको ज्यान जाने देखेपछि आरिफले रोजा तोड्ने निर्णय लिए । उनले डाक्टरको सुझावअनुसार दिइएका खानेकुरा खाए र रगत दिए । अहिले आरिफको सामाजिक संजालमा निकै प्रशंशा भइरहेको छ ।